【now.com財經】今朝列出三大原因指後市可以睇返好少少，仲揀咗隻恒指牛(58879)出嚟，希望可以搵靚位入市。一如以往嘅方法就係等恒指五分鐘圖Slow STC(14,3)回落去到超賣水平時入場；記得大前題係日線圖要守穩50天線(亦即係好倉以日線失50天線為止蝕位)。
等咗成朝，Slow STC(14,3)最低都只係喺11點40分左右，得%K線一個落去到35左右，%D線全程踩喺40或以上位置，根本連超賣嘅邊皮都掂唔到，唯有再等；又指數彈高之後又Keep住一個橫行嘅狀態，隨時都真係等到瞓。還好今朝喺作戰室嘅好倉動作，都有戰友成功收割。
上半場真係得頭嗰一個鐘叫做有啲嘢睇下，之後都橫行，同時更見保歷加通道口收窄。不過，嚟到依家1點8分，喺五分鐘圖上見Slow STC(14,3)%K線上破%D線之後，兩線有呈上向超買方向出法嘅情況，而指數亦再次站穩於保歷加上升通道裡面，但可惜到依家，點等都好，都係未見到可以入(58879)嘅靚位，或者好嘢係要等下嘅。
指數要等唯有睇下其他，今晚美股無市，美指輪唔搞住。季度業績都公布得七七八八，係星期四(6月2日)仲有一隻美團(03690)，而星期三(1日)領展(00823)公布全年業績，有追開【輪證贏家】一段時間嘅朋友都知道領展呢隻嘢基本上係我正股倉裡面「鐵膽」之一，「鐵膽」到我細細個喺佢廿幾蚊時已經每個月「自己同自己供股」嚟買佢當儲錢，中間有收割過，亦都有加注過，拉返個平均數計，佢依家呢個水平其實又唔係食得好多。
當年買佢係因為佢係一隻C9股，同民生必需生活用到嘅我都幾相信會係不死嘅行業，只可惜領展屋村得嚟都帶點劏檔商場味道，疫情雖然令到個別地方處所開唔到鋪，但街市同超市點都會交到租。
日線圖上見領展今年低位反而係喺3月7日嘅59.75元，而唔係3月中恒指跌過千點嗰時嗰位，同時亦見唔到如恒指或大型個股嘅裂口出現，完全無需要補裂口嘅情況存在。截至依家1點18分止，單位價格報71.3元計，今年3月底位回升咗19.33%，仲未夠，雖然Slow STC(14,3)兩線上到超買至嚴重超買嘅範圍，但保歷加通道口仍然拓闊緊呢。
領展Call(23660)，行使價74.88元，同現價有約5.17%價外距離，為市場第二貼價的價外Call之中屬高槓桿、低引伸，年尾到期唔怕時間值問題，反正都係博出業績之後，基金分派有所增加推高息率，市場對領展嘅價格又做多次Revaluation，增加上行可能性咋。(其實佢週線圖都啱啱見保歷加通道口拓闊架！)
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
