【Now財經台】藥明生物(02269)上海廠房4月中開始陸續恢復正常運作,管理層估計,未來4星期可全面復常,而封控期間對財政嘅影響亦唔大,只係有收入押後入帳,上海實施封控期間,藥明股價至今累跌超過20%,管理層嘅釐清對股價有幾大支持?
股評人李偉傑指,如果睇今日股價表現,管理層嘅釐清作用就唔大,其實藥明嘅核心問題唔止係封城,反而係中美關係,同埋集團喺美國嘅業務佔比狀況,所以今次解畫只能釋除市場其中一個憂慮。
Jason估計,藥明個底喺5字頭,現水平應該有一定防守力,但暫時好難出現爆發性反彈,3月中港股大跌時,藥明都見過4字頭,其後一直企穩5字頭,佢又話,依家係等緊一啲「藥引」,例如高管增持或回購,但暫時好難出現大反彈,短線反彈目標可以擺喺66至70蚊。