【Now財經台】贛鋒鋰業(01772)宣布入股稀美資源(09936)，稀美本身唔係做鋰礦，而係做稀有金屬「鈮」及「鉭」。贛鋒嘅通告提及，稀美同集團現有資源項目有潛在協同效應。贛鋒今年先開始投資鈮鉭礦，2月同上海聚錦歸組合營，但探礦及採礦權仲申請緊，贛鋒似乎想做多一瓣業務，但對本業鋰礦有冇幫助？
中國通海證券投資策略聯席總監阮子曦指，暫時好難評估協同效應有幾大，但贛鋒不停做收購，包括鋰、汽車產業鏈、客戶旗下常用資源等，似乎想變身成一隻綜合資源股，未來兩至三年鋰、汽車產業鏈、上流資源，仍會處於短缺狀態，但實際產量仍要慢慢觀察。
