【Now財經台】歐盟對成員國買俄羅斯天然氣嘅指引被指模稜兩可,一方面話可以合法購買俄國天然氣,但又警告唔好開盧布戶口。此外,芬蘭國有能源企業指,因應芬蘭申請加入北約,俄羅斯或最快今個星期截斷供氣。雖然俄羅斯天然氣供應持續不明朗,但歐洲天然氣價又未見持續急升。
艾德證券期貨投資策略總監文錦輝指,依家唔係歐洲寒冷季節,各國對天然氣嘅需求相對冇咁大,睇返之前烏克蘭截斷俄羅斯天然氣管道,都冇令氣價扯高,加上部分國家已經用盧布結算,加上美國對制裁俄羅斯能源嘅態度有變,能源價格未見再抽升,估計歐洲天然氣價升幅亦有限。