【Now財經台】聯想集團(00992)股價今日受壓，除咗受大市氣氛影響外，亦因為麥格里下調今、明兩年銷售，又估計收入及純利都會倒退，宏觀經濟及供應鏈因素，照計對聯想嘅影響應該唔會長達兩年，會唔會同結構性問題有關？
艾德證券期貨聯席董事陳政深指，聯想業務集中喺個人電腦，參考2022年第1季全球PC出貨量按年跌5.1％，亦見到聯想嘅「一哥」地位仍然穩固，但預期PC銷量喺疫情放緩後將會回落，向上動力減弱，相信對聯想未來嘅業績有一定影響。
結構性問題方面，現時行業增長動力減弱，加上聯想嘅業務結構主要集中喺PC，毛利率、發展、增長空間較大嘅業務佔比太少，Ryan認為，只要呢個結構一日存在，聯想業務好難有足夠增長動力為市場帶嚟憧憬。
