【Now財經台】候任行政長官李家超嘅公共房屋政策，包括成立兩個由司長級統籌嘅工作組，分別係「公營房屋項目行動工作組」及「土地房屋供應統籌組」，又提出「公屋提前上樓計劃」，容許部分公屋起咗一、兩幢，即使未有完善配套仍提前入伙，但有聲音認為，部分新屋邨位置偏僻，交通設施不足，居民出入唔方便，如果連商場或零售設施都冇，居民生活會非常唔方便。
房委會資助房屋小組前主席黃遠輝指，兩個小組嘅著墨點係正確，房屋供應上有助提速、提效，但提量方面就同以往冇分別，所以除咗呢兩個小組，相信下屆政府要專注喺提量方面，究竟可以點樣透過新措施增加額外土地供應，現階段土地供應主要建基於兩大板塊，首先係「明日大嶼」，但要睇返最終面積，到底係顧問研究所指嘅1000公頃，還是特首林鄭月娥所講嘅1700公頃，其次就係北部都會區。
