【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、旭輝控股集團(00884)、建設銀行(00939)、新奧能源(02688)、瑞安房地產(00272)。
旭輝、瑞安兩隻內房股都有消息，旭輝曾逆市升1%，據《財聯社》報道，旭輝擬下周啟動信用保護工具融資，今朝一度升近3%，瑞安亦一度升近1%，冇上榜嘅碧桂園(02007)，即使有債務問題，但上晝都反覆向上。中央之前講過，房地產要保持平穩健康發展，內房最壞時期係咪已經過咗？
椽盛資本投資總監曾永堅指，中央近期陸續向市場發放清晰訊號，表明力撐內地樓市，但個別房企能否過到今次內房「大洗牌」呢關要拭目以待，不過，一啲財務狀況唔太差嘅內房，可以獲得市場認為較可行及明確嘅融資渠道，例如旭輝及瑞安，可以令市場對內房股回穩及信心帶來正面效果。
