【Now財經台】燃氣股今日跑贏大市,其中,中國燃氣(00384)暫時已連升第7日,暫時係連升日數最長港股。近期左右燃氣股走勢一個主要因素係國際天然氣價格,自俄烏戰事爆發以來,氣價走勢異常波動,而歐盟同俄羅斯就天然氣進口仲未傾掂數,對燃氣股有咩影響?
華盛証券分析師聶振邦指,夏天好快就到,歐洲對於天然氣冇逼切需求,歐盟同俄羅斯仍然有時間傾支付問題,不過,芬蘭及瑞典表明加入北約,俄羅斯有可能切斷對芬蘭嘅天然氣供應,到時會就推高氣價。
聶Sir又話,中燃股價本身相對落後,所以依家追返上嚟都好合理,不過,要留意喺11.5元水平會有阻力。