【Now財經台】截至早上11時止，1小時內《彭博》用戶關注度上升最多港股，依次為佳源國際(02768)、中國東方航空(00670)、永利澳門(01128)、澳博控股(00880)、富力地產(02777)。
佳源系兩隻股份今朝急挫，之後佳源國際於早上10時21分停牌，停牌前急瀉逾41%，而佳源服務(01153)亦於10時30分宣布停牌，停牌前更暴瀉逾70%，話待刊發公告，但睇兩隻股份跌得咁急，似乎係斬倉事件。
耀才證券研究部經理譚智樂指，今次一定係意外，冇人會估到突然跌得咁快，到底係純粹斬倉，還是有恐慌事件發生？現階段就判斷唔到，但投資者都盡量唔好掂呢兩隻股份。雖然呢次對成個內房板塊嘅影響應該唔大，但短期而言，唔排除其他內房股有機會出現類似情況，投資者必須保持謹慎。
