【Now財經台】截至早上11時止,1小時內《彭博》用戶關注度上升最多港股,依次為龍光集團(03380)、融創中國(01918)、寶龍商業(09909)、合景泰富集團(01813)及旭輝控股集團(00884)。
截至去年底止,寶龍手頭現金約40億人仔,向母公司買入1幢位於上海嘅辦公大樓後,仲有31億現金。雖然爆發內房危機,但寶龍過去一兩年冇減派息,又冇任何融資動作,呢啲仲係咪寶龍嘅賣點?
寶鉅證券董事及首席投資總監黃敏碩指,商業物管嘅收益、毛利率都較高,但面對內房危機都發揮唔到優勢,冇辦法提升寶龍嘅抗跌力,連較大型嘅華潤萬象生活(01209),股價浮浮沉沉後,仍偏向下行,反映商業物管股已失去優勢。
Michael又話,寶龍4月上試過8元水平嘅高位,但呢幾日再「甩底」,跌穿埋3月低位,後市有機會進一步探底。