【now.com財經】今朝度咗個日線圖,大型「楔形」底向下穿咗,又可能一開市無701點,即市再落都係低見19,178點,講緊都只係開市首五分鐘之內發生嘅事,期後見指數低開高走,都有揀定隻恒指熊(50274)出嚟,預備喺五分鐘圖上見到指數同50分鐘線(五分鐘圖10線)見阻力時就出手。但最終都係無見到,指數仲上到去保歷加中軸水平,唯與此同時保歷加通道口收窄中,Anyway,就係搵唔到位再入隻熊證而指數有開始橫行悶局嘅情況,作戰室即市有吼到指數上破唔到中軸就小注試水溫Mode出淡倉,只係爬格仔目標係保歷加通道底線;唯由保歷加通道口Keep住收窄嘅情況下,呢注淡倉都爬得唔係咁輕亨鬆。
BTW,有讀者提醒(或者係接住問/感謝)我上個星期五喺【輪證下半Part】裡面揀咗隻納指Put(10373)出嚟,仲話不妨小注一試,呢啲貨仔的確唔係可以做到即日鮮,所以基本上如果真係要吼,都只能拉個日線圖,Set定以「日」做單位嚟玩。如果(10373)今朝早已經收割咗嘅話,恭喜你,都唔駛多謝我,你都有付出(落注嘅真金白銀同埋過三日夜嘅耐性)。仲揸喺手或者想嚟多Round嘅,又睇睇個納指走勢,值唔值得再追落去。
開個日線圖,近鏡見納指保歷加通道口再現拓闊情況,Slow STC(14,3)兩線向下並處於超賣至嚴重超賣範圍,但就未有出現超買再超賣走勢,的確有種跌勢未止嘅現象。
拉遠少少的話,用2020年嘅低位(6,631.42點)至2021年嘅高位(16,212.23點),以Fibonacci嚟界開個圖的話,0.5呢個位就係11,421.825點,同上個星期五(5月7日)收市價11,623.25點都只係爭201.425點,坦白講,兩步路就到,只係問題在於0.5呢個位穿定唔穿。
「咁道指又好唔好Trade?」作戰室有戰友問到。好簡單,睇多次咪得囉。近鏡見道指走勢其實同納指相約,都係保歷加通道口有見拓闊,Slow STC(14,3)兩線向下,但目前只得%K線進入超賣範圍。
拉遠個日線圖,同以2020年嘅低位(18,213.65點)至2021年嘅高位(36,952.65點)拉個Fibonacci出嚟的話,見到指數只係剛剛失第一格,即0.786呢個位,比例上似乎道指無納指跌得咁多,但係咪等於一定要追返咁多?未必嘅,只可以話道指可以再落嘅空間同機會比納指多啲咁解啫。
之前都有講過關於美指輪嘅到期日問題,大家可以翻查舊文重溫。道指沽(10393),行使價30,800點,同現價有約4.48%價外,低引伸、槓桿偏高,小注落場,不妨一試。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。
想入作戰室?Click呢度就得:https://www.patreon.com/cbbcwar