【Now財經台】長飛光纖光纜(06869)今朝輕微低開後，好快就掉頭向上，午後升幅擴大，一度高見11.58元，大升近9%，升勢亦有成交配合，成交股數較過去100日同時段增1.5倍，成交金額逾4500萬。
長飛光纖上星期派咗第1季成績表，受產品銷量及單價上升帶動，集團營業收入按年增長56%，盈利更飆逾1.4倍，放榜後即獲2家大行唱好，其中摩根大通估計，長飛光纖全年盈利有機會復甦。
長飛光纖喺大成交配合下，暫時連升第6個交易日，一度升穿100天及250天線，但唔係企得好穩，尤其100天線仍受制舊年10月拉出嚟嘅下降趨勢線。
