【Now財經台】內房債務危機舊年講得好熾熱，但今年似乎少咗談論，市場都好似唔再關心，就連內房今年銷售放緩都冇乜人講，唔再成為「焦點」，對內房嚟講係咪好事？
廣東省地產商會副會長尹德輝指，其實內房嘅問題仍然好嚴重，只不過畀更多更嚴重嘅負面消息蓋過咗，例如疫情及俄烏戰事等，佢又話，之前提及嘅內房佳兆業集團(01638)、碧桂園(02007)等，大家耳熟能詳嘅公司，債務危機仍然存在，只不過經過半年，都已經用咗唔同方法處理，例如樓起唔到就國企接手、出售資產等，但佢坦言，情況係冇改善，而一手第1季銷售係極差，少咗30%至40%，成個現金流及應收帳都係好大鑊。
