【Now財經台】創夢天地(01119)今朝輕微高開後轉跌，早市變動唔大，但下晝2時30分後，突然洗倉式急瀉，一度暴瀉逾74%，低見1.06元，創上市新低，其後收復部分失地，收市跌逾49%，報2.09元，成交股數較過去100日同時段平均飆逾47倍，成交金額都好誇張，超過5.5億元。
其實公司近期冇乜壞消息，翻查年報亦冇股東押股紀錄，但公司喺2018年5月，同一間外商獨資企業前海創夢達成過一單股權質押協議，但其實都係創夢天地相關公司。
中央結算方面，喺券商之中，富途倉位持股超過9%，排第4位，今日沽盤主要由富途掛出，可能真係有不知名投資者被斬倉，觸發其他散戶恐慌，造成「人踩人」，不過，港股呢邊暫時未有相關消息，都只係得個「估」字。
創夢天地星期五會喺深圳召開股東大會，股價今日跌到咁，肯定要同股東交待，留意到時公司點講。
