【Now財經台】今日中午出咗首季經營數據嘅海豐國際(01308)，首3個月集裝箱航運業務收入升66%，主要受惠於運量及平均運費上升，集裝箱運量按年升4.8%，運費按年升62%，帶動期內整體收入升65%，第2季表現可唔可以保持？令運費高企嘅因素仲存唔存在？
中國通海證券投資策略聯席總監阮子曦指，第2季運費要睇返公司嘅航線，外圍市場部分集裝箱運費係跌咗少少，因為已經陸續開通返，睇返海豐，公司嘅運費繼續上升係有可能，但升幅會開始收窄。不過，始終要留意疫情發展，上海港口幾時全面恢復正常運作，對運費係有好大影響，至於油價格高企暫時對海豐毛利率冇太大影響，因為成本可以轉嫁畀消費者。
