【股市脈搏】9990隨時被踢出科指成分股

【Now財經台】祖龍娛樂(09990)係今個月表現最差科指成分股，今日平開後，隨即向下，仲愈跌愈多，尾市更不斷創新低，一度低見13.16元，跌逾4.6%，創新低，最終以接近全日低位收市，報13.22元，跌4.2%。

祖龍娛樂上市唔夠1年，3月尾出咗上市後首份全年業績，雖然蝕近7.6億人仔，但拆開上下半年睇，下半年係扭虧為盈，賺2800萬人仔，而全年經調整利潤2.18億人仔，業績總算有改善，不過，股價都係冇起色。

恒指公司下個月會公布第1季指數檢討結果，估計科指成分股都會有變動，依家祖龍娛樂市值得返107億元，比起高峰期逾190億元冇咗近一半，小心有被踢出科指成分股嘅風險。