我的股票

    名稱 現價 升跌

    資料報價延遲十五分鐘

    【輪證下半Part】下一隻創新高又邊個?

    【輪證】 2020/10/29 14:38

    【now.com財經】食完個飯返嚟之後,騰訊(00700)再創新高,而噚日睇話下一個創新高嘅美團)03690)亦如願以償;而今朝聊天室室友都先後開咗恒指牛,雖然有啲一早收割晒,有啲就仲揸到依家,不過總算有餐晏食吓。

    依家2點7分,搵過好多股份嘅走勢圖,大部份5分鐘圖所見都已經搶到超買,但市就真係仲有得去,無他嘅,當噚日騰訊創完新高之後,今日回一回,就引到一堆資金入場,博佢再創新高,所以喺下半場開市之後就愈推愈有,室友再次舉手想入恒牛,望望走勢圖,剛剛見30分鐘圖嘅保歷加通道都過埋,唯一仲有一個就係小時圖仲未過,呢一注就當係小時圖博過保歷加通道中軸。

    騰訊、美團都創咗新高,一下隻又到邊個?阿里(09988)?小米(01810)?京東(09618)?三隻嘅機會都唔細。

    阿里就因為螞蟻上市而成功晉身$300以上位置,噚日高見$309.4創新高,相信螞蟻未正式上市之前佢都仲有得去。

    至於小米,日線圖見今日Kick住咗喺20天線($21.678)同50天線($21.435)呢度,而暫時(截至2點31分止)小米高位$22.2,都尚算叫做升穿咗10天線($22.12),而SlowSTC(14,3)喺3X呢個超賣平中軸水平見%K線升穿%D線,呢個位當然不如以往鐘擺策略以超賣/超買為準,不過當如果要將個市嘅氣氛進一步炒熱,ATMX輪流上都唔奇。

    最後隻京東,最直線嘅諗法就係「雙11」,而目前京東都同大市一樣見紅中,不過股價下行至20天線($310.68)水平,而SlowSTC(14,3)都見%K線升穿%D線,只係兩線都處於70以上嘅超買水平。

    三隻都似係下一隻破位佳麗,但三隻都似乎要再睇多個回合先可以揀得到,不如等聽日泳裝問答環節,再作決定吧。

    作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

    FB/IG/Patreon/秒投聊天室:輪證贏家

    想睇更多財經消息