我的股票

    名稱 現價 升跌

    資料報價延遲十五分鐘

    標籤: 1462209618

    【輪證下半part】恒指STC日線圖彈但VHSI STC 跌?

    【輪證】 2020/07/29 13:42

    【now.com財經】頭先睇午間新聞,頭條就更係講今日第一日全日禁止堂食生效,要返工嘅一班打工仔喺公園、街邊開餐,有時甚至只係搵到個石壆位就當係檯,企喺街邊度開飯。

    碌FB仲見到有media影到有公園清潔工開飯時撞正落樓,唯有夾住把遮、踎喺啲長凳度食飯;叫坐喺梳化,對住風扇同電視咬住個包嘅我幾咁情何以堪。

    望望鐘,1點過後又到下半場時間。今日個市確實有啲悶,今朝上到去24905點之後又再向下行,至依家做緊24755點,跌17點,不過見5分鐘圖上條SLowSTC(14,3)一早抽起咗。

    恒指雖悶,但總算有上有落;慘得過隻京東(09618)今日裂口低開之後向下慢行,5分鐘圖上SlowSTC(14,3)完全無起色,有啲擔心京東Call(14622)都唔捱得幾耐。

    再返去睇恒指日線圖情況,不過見日線圖上SlowSTC(14,3)%K線低位抽升%D,似乎50天線嘅技持係有啲籵到,唔通依家個大市係是等緊一個消息爆單邊?咩消息don't care啦,反正都唔係重點,事實次次都係等緊牛熊街貨再近啲同再儲肥啲,然後先至一鋪過清佢袋啫。

    按恒指點數同牛熊證街貨分布嚟講,呢一刻是但落一邊牛熊,同賭大細一樣,見日線圖上恒指燭身愈來愈窄,似乎荷官就嚟嗌「開定離手」。

    講起燭身窄,望望條恒指波幅指數(VHSI),怪不得悶局到咁,原來條VHSI回落中,但SlowSTC(14,3)依家先喺6X向下行,咁即係點呀?恒指日線圖彈但係波幅指數下行,即唔彈得高呀?聽日期結架啦喎,大佬,依家點先?叫你經理出嚟!

    作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

    FB:輪證贏家

    想睇更多財經消息