我的股票

    名稱 現價 升跌

    資料報價延遲十五分鐘

    標籤: 01299

    【輪證下半Part】無方向無謂落場

    【輪證】 2020/07/08 14:37

    【now.com財經】依家2點7分,喺公司食完個外賣(今日食鯖魚,好健康呀!)之後,再沖多杯茶,返到埋位,就見到恒指升幅已經縮到得返十零點;至於今日睇過嘅友邦(01299),開5分鐘圖見到喺今朝大約11點至11點20分時,SlowSTC(14,3)上到去70以上,嚴格嚟講算係一個超買位置,不過,今朝講友邦呢嘢時,基於未能夠完全確定佢喺日線圖上係出現轉勢,於是都只係放喺watch list入面,而係呢刻SlowSTC(14,3)由20幾向下行緊落去,對比返股價走勢,雖然無SlowSTC(14,3)向下行得咁斜,但總算叫做跟得到,怕且距離開淡倉之日都不遠矣。

    暫且由得隻友邦hea住先,睇返條恒指,250天線得而復失,換條保歷加通道出嚟就見到恒指今日下行,技術上已經重返保歷加通道裡面,只是就保歷加通道上作出一種修正啫,但以目前恒指呢個悶市走勢,怕且今日燭身都不如星期一(7月6日)嘅咁高,「黃昏之星」未必可以成形;但從SlowSTC(14,3)上已見鐘擺,只可惜今日睇牛證收回價水平,市場上最貼價嘅仍然都係24921點,即係話即使聽日開牛熊證街貨圖睇,最貼價牛證層仍然都係24900至24999點,同現價有逾千點差距。呢個距離除非市場上有重大負面新聞發生,否則要一步到位都有啲難。

    至於熊證方面,同樣地見到市場上最貼價嘅熊證,收回價為26788點,即係話26700至26799點呢層,喺聽日仍然都係見到處於最貼價熊證街貨位置。牛熊兩邊都無新增街貨,再加上恒指今日仍然悶局,更加反映到大市就係想等更新、新貼價嘅牛熊證上市後,再比資金進一步貼價追位,儲到咁上下街貨時先再殺,企喺度等總好過浪費點數去追街貨。

    面對呢啲困局時,好多時有唔少投資者會向傾孤注一擲,「反正同現價差咁遠,揀隻最貼價嘅都唔怕打靶啦。」呢個諗法的確無錯,但事實係咁遠收回水平嘅證,槓桿一定唔會高,變相要大市再走比幾步,先至可能可以有肉食;但依家個市似乎係早幾日已經食滯咗,唔想行。

    或者今日都應該安份守已,得閒、無嘢做、唔駛開會嘅時候先去睇下個市;既然無方向水無勝算,何必要落場呢?(錢多另計)

    作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。

    電郵:gladyshan@gmail.com;FB:輪證贏家

     

    想睇更多財經消息

    相關股票

    編號名稱
    01299友邦保險