我的股票

    名稱 現價 升跌

    資料報價延遲十五分鐘

    標籤: 輪證

    【輪證下半Part】剪羊毛

    【輪證】 2019/08/15 14:57

    【now.com財經】聽住民間記者會打呢篇稿,今朝隻稿有講過話想計啲數係同之前恒指出現相對較大型嘅「股災」去比較一下,係呀,就係1997年嘅亞洲金融風暴、2008年嘅全球金融海嘯。有一樣嘢係需要喺開始之前講清楚,就係呢個只係純粹用數值同圖表走勢去比較,真係真係僅供參考。(你咪當呢期個市乜無好寫而我又有時間去計啲數,自high咁囉)

    用月線圖由1997年初拉個圖出嚟至依家,港股經歷過風暴同海嘯之後,呢廿年嚟都係沿住一條「上升軌」往上行,無他嘅,你可以計及當中有通脹成份存在(正如我舅父話佢細個嘅年代$70至$80可以睇醫生,依家$300...有找幾十蚊咁囉;楊受成本自傳話佢年輕時用$50000買咗好似位於太子道嘅一個單位(有錯請更正我,都係早幾年睇,唔係好記得),依家我諗可以買到太子道嘅兩格階磚掛)。

    睇返個月線圖,圖中會見到每每喺風暴/海嘯嚟臨之前,大市總會出現一個令投資者瘋狂嘅升幅(深藍色圈圈),上到當時嘅高位之後,風暴/海嘯就隨即出現,一個比較明顯且持續嘅跌勢隨之而來,但留意番,其間總會有一個小型反彈(淺藍色圈圈),心水清嘅會視呢個為出口;仍未抽離到之前上到高位嗰種抗奮嘅話,就會覺得呢個係見底反彈嘅標誌。結果心水清嘅錢就成功避過終極一跌(灰藍色圈圈),而之前未抽離到大幅上升嗰種抗奮嘅人,呢一刻先至抽離得到。

    數值上可以睇睇excel計出嚟嘅表(其實我係鍾意手動計的),整個風暴/海嘯由最高位度到落最終一跌水平,跌幅講緊有六成以上;同時恒指市盈率(PE)亦都無咁一半。明白風暴/海嘯呢個名點得嚟,同埋當時嘅威力嗎?

    呢種就係《貨幣戰爭》作者宋鴻兵書中所講嘅「剪羊毛」:「國際銀行家一個賺大錢的手段就是制造經濟衰退。首先是擴大信貸,將泡沫吹起來,等人民的財富大量投入投機狂潮後,然後猛抽銀根,制造經濟衰退與資產暴跌。當優質資產價格暴跌到正常價格的十分之一甚至百分之一時,他們再出手以超級低廉的價格收購,這在國際銀行家們的術語叫做『剪羊毛』。」

    呢啲嘢又無話興唔興嘅,正所謂「橋唔怕舊,最緊要受」。

    好啦,望返今次,月線圖上都有類似嘅瘋狂上升至頂(2018年1月高位33484點),同埋一個小型反彈(2019年4月高位30280點),現水平過咗個小型反彈,兼8月至今畫出嚟嘅大陰燭,仲未殺到落去100月線(今朝畫圖時報23973點),而呢個水平亦稍為高過今朝用日線圖畫「頭肩頂」量度跌幅水平23205點,高大約768點,以幾千點嘅點數跌幅嚟比較,768點作為緩衝亦不為過。換言之,假設內憂外患持續落去(亦根本無可能短時間內解決),用圖表去睇港股嘅話,預個市下行多2000至3000點,目前喺呢一刻,呢個心理準備真係需要有。

    至於用數值去計嘅話,坦白講暫時計我仲有少少保留,講緊由高位跌六成嘅話,即33484點嘅六成就大約係20090點,呢個位雖然未到250月線(今朝畫圖時報19175點),但要如果個市落得到呢啲水平,似乎唔係靠美國經濟疑似衰退同香港政治問題出現而可以做得到,講緊正真係整個亞洲/歐洲一齊爆先有咁嘅威力,即係好似當時啲亞幣狂瀉、歐洲啲GDP、CPI、PPI...個堆數字係N年來創新低。

    你問我,呢一刻睇淡係大方向;而明白大家可能都係想睇吓啲即時炒作嘢嘅,但坦白的說,咁嘅市況好難再即時炒輪證,一係就好得閒可以坐喺度望住個市,用高槓桿牛熊去炒升跌,一係就用隻遠啲Put hea喺度;否則,無貨嘅繼續無貨,有貨嘅亦都唔會等到依家先嚟走貨,月供緊嘅就由得佢繼續月供,反正月供嘅係用平均成本法,價愈低你愈可以買多幾股。

    本來想計埋喺風暴同海嘯時,當時恒指成份股嘅表現,睇吓有無啲嘢可以部署下,但係...我暫時未計得切。如果你哋都想知嘅話,提我。

    作者阿珊,任財經/投資版傳媒人十幾年,《鐘擺戰略贏港股》作者。用技術分析專心玩輪證,唔貪心,志在搵餐下午茶。

    電郵:gladyshan@gmail.com;FB:輪證贏家

    想睇更多財經消息