【專家分析】民營房企勁彈因為...

【Now財經台】內房物管板塊本周表現好轉，其中愈財困、賣樓成績愈低迷嘅民營內房企業反彈幅度反而愈大，以合景泰富集團(01813)走勢最勁，累彈45%，反觀同期中國海外發展(00688)、華潤置地(01109)等國企只係升7%及4%。

紅蟻資本投資總監李澤銘認為，市場賭緊中央放鬆甚至取消「三條紅線」政策，因為國有內房今年銷售已見反彈，只有民企發展嘅項目冇人吼，可見內地民眾仍然擔心民企冇政府解決融資問題，有機會交唔到樓，惟有調整呢個政策，先可以增加佢地對民企嘅信心同提高入市意欲。

Alan續指，「三條紅線」最困擾民營內房嘅規定係限制佢地融資或禁止佢地再借錢。即使公司有做債務重組，但只係爭取用更長時間償還債務，加上賣樓收入大跌，令資金未能回籠，陷入惡性循環。

Alan相信，「三條紅線」政策未必咁快放鬆，但預期今個月會減貸款市場報價利率(LPR)，降低民企融資成本。