【名家給力場】恒富復牌喪炒賣盤有貨可先止賺

【Now財經台】從事成衣製造、貿易及證券投資業務嘅恒富控股(00643)今日復牌，股價狂飆逾2倍，主席兼大股東擬以每股0.239元，悉售其持有逾50％股權，較停牌前股價輕微折讓。買家馬小秋係現任中國投資基金(00612)及富匯國際(01034)等多家上市公司主席或執董，股價復牌狂飆係咪同呢位新主有關？股價會唔會進一步被推高？

《香港股票財技密碼》作者梁杰文指，恒富股價過去7、8年跌唔停，而且冇反彈過，公司突然宣布賣盤，而買家活躍於港股及細價股市場，令市場有炒作憧憬。

不過，Mike認為，雖然新股東有財務實力，但佢出任主席嘅兩家公司，股價都大幅波動，中國投資基金更曾被監管機構點名指，股價有被操控之嫌，或為恒富帶嚟負面因素。佢又話，恒富現價高要約價逾2倍，現有股東最適當做法係趁反彈先行沽貨套現離場，再觀望值唔值得再買入。