【FINTERVIEW】息魔肆虐美股「股災月」有難？

【Now財經台】美國聯儲局上星期議息後，美股市況急速轉差，截至噚晚為止，已連跌5個交易日，3大指數技術上已「見熊」，睇返投資市場嘅情況，股市投降式下跌，債息抽高，商品價格轉弱，其中債息扯高係咪主要反映加息預期，還是經濟衰退？此外，摩根士丹利首席策略師Michael Wilson估計，美元每升1%，每股盈利嘅影響約0.5%，似乎反映美元持續強勢不利美股。

高富金融集團投資總監梁偉民指，美國加息預期已經反映晒喺債息上，但聯儲局未來加息到底有幾進取，最終都係睇通脹，但睇返市場依家嘅情況，似乎有過分緊張之嫌，近期商品及能源價格都回落咗，相信呢啲因素會逐步滲透落去通脹數據，繼而令通脹見頂回落。

美股方面，Wyman坦言，美元太強係不利美股，因為唔少上市公司嘅收益都係來自海外，因此，當呢啲收益折算為美元時就會縮水，會直接影響盈利增長，不過，睇返美股今年嘅走勢，美元唔係影響大市最主要因素，而係聯儲局加息步伐，美股今年一度反彈，原因正正係市場預期局方會放慢加息步伐，甚至停止加息，依家美股再跌過，亦係受加息因素拖累，佢估計，如果情況持續，美股將持續受壓。