【股市脈搏】呷哺新品牌「腳頭好」

【Now財經台】呷哺呷哺(00520)今朝高開逾2.5%後，一度升逾20%，高見5.69元，成交股數較過去100日同時段平均增3倍。

除咗國慶長假好快就到，呷哺本身都有消息，集團全新品牌「趁燒」上星期六喺上海正式開業，公司計劃至2023年會開最少20間店，選址會瞄準一線城市一啲網紅打卡點，而2024年開始預期會以每年最少開30間舖嘅速度擴張。

「趁燒」開張前，呷哺股價曾連升7日，今日一度上到5.69元，衝上近8個月高位，但之後沽盤湧現，但MACD仍然向上，牛差距仲可以維持住，留意之後公司會唔會發放「趁燒」嘅銷售數據，大行又會唔會因應公司新業務發展重新評級。