【FINTERVIEW】中央靠減息救內房？

【Now財經台】內房板塊今朝再現沽壓。近日龍湖集團(00960)被傳商票違約，公司噚日澄清後股價一度反彈逾11%，但今朝又跌過，一度倒跌6%。

資深證券業人士溫天納認為，龍湖股價大跌係股民杯弓蛇影，但投資者見到中國恒大(03333)系等內房嘅財務危機後，都對呢類消息非常敏感，或認為空穴來風必有因。

上月傳出各種緩解內房問題嘅方案，包括由人民銀行牽頭嘅房地產基金，又憧憬減息等。

Ronald話，部分房企嘅債務規模高達數千億人仔，靠房地產基金「救火」，明顯係杯水車薪。

在內地「房住不炒」方針不變下，中央或會選擇靠減息提振內房流動性，Ronald認為，LPR有下調空間，估計中央較大機會會喺8月22日宣布下調5年期LPR。