【名家給力場】內房「雨過天晴」？

【Now財經台】港股似乎應驗咗「Sell In May」，恒指今個持續弱勢，藍籌內房亦跟跌，其中碧桂園(02007)今個月暫時累跌逾10%，新冠疫情繼續喺內地唔同省市爆發，似乎內地一日唔調整清零政策，內地跟香港及澳門都通關無期。板塊方面，賭股呢兩日表現非常差，賭場因為冇客要「燒錢」渡日，呢個流動性憂慮會唔會再引伸去內房？

廣東省地產商會副會長尹德輝指，早前嘅內房危機，中央預視到如果唔主動出手，一旦突然爆發就會影響全球股市。早前嘅中國恒大(03333)危機，亦係中央主動透過制度手段化解，而家恒大嘅地盤基本上已全面復工。

佢又話，以前個市無論升定跌，內房股都升，但依家同大市升跌掛鈎，原因係市場會睇返業績、賣樓表現、預測利潤等數據，又認為投資者可以忘記過去嘅內房危機，當內房股係新股咁睇。