【專家分析】理想汽車全年交付達標有隱憂

【Now財經台】理想汽車(02015)股價3連跌，累跌約15%，集團近日發布新車「理想i8」，最終定價較預售價平好多，新車安全測試片段更惹嚟網上熱烈討論，話題多多之餘，市場反應亦傾向負面，會唔會對集團全年交付目標帶嚟壓力？

王道資本及家族資產管理執行董事黃敏碩指，市場對理想嘅宣傳攻勢反應麻麻，喺市場持觀望態度下，有機會進一步影響新車銷情，加上車企業績參差，似乎行業下半年都係要面對「紅海競爭」，除非好似比亞迪股份(01211)等大型車企，可以做技術升級或拓展海外市場，否則，主力做車嘅公司仍要面對「內捲」問題，所以對理想股價及業績前景保持審慎。

Michael又話，如果負面因素持續發酵，股價下行壓力大，要留意公司有冇新突破，或有冇措施令市場重拾信心。

全年交付量方面，現階段預測下半年數字屬言之尚早，未來可以繼續關注第3季交付增長情況，若9月仍未達標，相信第4季都唔容易追到全年目標。