【專家分析】點解鋼鐵股減產一日炒完？

【Now財經台】近日內地部分被關稅針對行業，包括鋼鐵、鋁材、光伏等產品紛紛被炒高，主要係傳出相關行業整頓產能過剩消息，包括據報唐山鋼鐵冶煉廠收到限產通知，於今日(4日)至7月15日生效，已經有多家鋼廠指收到通知，限產幅度30%，據行業估計，當地產能利用率或因而由83%降至70%，每日減少約3萬噸，部分鋼鐵股周三(2日)應聲炒高1倍，但昨日(3日)出現回調，產量大幅減少，點解相關股份咁快已炒完？

王道資本及家族資產管理執行董事黃敏碩指，雖然供應大減，但仍要推升需求，股價先有機會保持升勢，另一方面，要經濟大環境好轉，發電、建築鋼材等需求增加，先可以支持到業績，鋼鐵股股價或業務本身都一直比較差，又缺乏市場信心推動，唔係一次減產就可以幫到行業翻身，加上鋼鐵行業同依家電子產品等熱門消費品嘅關聯度較低，只能靠內需推動，所以一直落後。