【專家分析】京東做埋「外賣仔」美團有難？

【Now財經台】美團(03690)同京東集團(09618)喺外賣生意上嘅競爭白熱化，美團旗下「美團閃購」加入即時零售市場，京東就踩入外賣市場，到底美團及京東邊個會較傷？

大華繼顯策略師楊韻銳表示，雖然兩家公司正互相傷害，但相比之下，美團會較京東傷，因美團將面臨加大補貼、成本上升，但生意份額未必可以keep到嘅雙重打擊。

Curtis續指，踩入對方嘅主業係必然發展，因為兩家公司嘅優勢都係配送網絡，雖然美團喺午市以外嘅時間，搞新零售、即時零售等，可以完全善用運送騎手，不過，美團好難威脅到京東嘅電商業務，因美團未必做到京東擅長嘅自營項目及電子產品。

Curtis又話，市場去年曾經憂慮抖音加入外賣市場，會對美團構成威脅，但對美團而言，京東比抖音嘅威脅更大，因為抖音本身冇自己嘅配送網絡，外賣市場未必做得好大，反觀京東有完善嘅配送項目，踩入外賣市場好大機會影響到美團嘅外賣主業。