【專家分析】「蔚小理」跌完未？

【Now財經台】新能源車股近日跌得好急，仲蝕緊錢嘅「3大造車新勢力」蔚來(09866)、小鵬汽車(09868)、理想汽車(02015)，股價分別自6月高位回落約40%、70%、50%，今日3隻股份再插水，其中跌得最甘嘅理想一度大跌逾17%，蔚來曾挫逾10%，而小鵬不論喺美股或港股都續創上市新低，到底「蔚小理」要跌到幾時？

亨達財富管理董事總經理姚浩然表示，3間車廠嘅銷售數據，7月起按年增長顯著放慢，令好多投資者認為6月前嘅股價係畀多咗溢價，加上龍頭比亞迪股份(01211)跌埋落嚟，拖累其他車股跌唔停。

姚浩然又估計，「蔚小理」之前溢價介乎20%至30%，所以小鵬股價回落咗70%係合理，而蔚來、理想應該仲有下跌空間，如果「股神」巴菲特未來再減持比亞迪，蔚來及理想可能又要跟跌。