【專家分析】時代電氣食正新興裝備潮

【Now財經台】時代電氣(03898)股價今日逆市造好，公司噚日宣布透過中車時代半導體，投資兩個中低壓功率器件(IGBT)項目，包括新能源汽車及發電，涉資逾100億人仔，時代電氣呢個舉動係咪食正新興裝備熱潮，令公司業務更具增長動力？

中國通海證券投資策略聯席總監阮子曦指，由資本開支去睇，超過100億人仔嘅產能擴展屬於大投資，而消息公布後巿場反應都幾正面，公司業務及股價都可以受惠。內地基建放緩後，時代電氣嘅軌道項目業績亦受拖累，進入新能源領域後，獲得雷諾汽車等外國生產商認證，可以給予估值肯定。