我的股票

    名稱 現價 升跌

    資料報價延遲十五分鐘

    標籤:分析

    【環球金融快線】李韻晴淚灑國會無礙英股

    【分析】 2025/07/04 12:01

    【Now財經台】英國下議院喺當地時間周三(2日)召開會議期間,有議員詢問首相施紀賢(Keir Starmer)係咪支持財相李韻晴(Rachel Reeves)留任,施紀賢迴避呢個問題,坐喺施紀賢後面嘅李韻晴,畀人影到佢疑似落淚,呢一幕觸發英鎊急挫1.3%,由1.375直插1.356水平,英國10年期國債孳息就升穿1.6厘,其後施紀賢「補飛」,喺一個訪問中大讚李韻晴工作表現出色,又話流淚事件同私事有關,英鎊就即時回升,債息亦回落,今次事件對英國股市影響有幾大?

    Solomons Group亞太區投資及ESG總監黃耀宗指,今次事件可以解讀為炒作,因為呢類政治消息或令市場擔心政策方向有變,但相信對英國股市影響唔大,更值得留意係,英鎊開始偏貴,短期或會開始造頂,不過,富時100指數嘅企業都係國際巨企,財政政策未必咁容易影響企業表現,反而可以留意對英鎊敏感嘅企業。

    佢又話,如果投資者想捕捉呢啲短暫波動獲利,用外匯交易操作會比較好,但做中長線投資部署,就要睇政策面及經濟情況。