【環球金融快線】歐股追落後 法國睇高一線

【Now財經台】歐洲股市今年一直跑贏其他地區嘅股市，以美元計價，歐股3大指數，即英國富時、法國CAC及德國DAX今年已累升16%至33%，市盈率(PE)介乎約13倍至18倍，股息率2.4厘至3.5厘，不過，自中美上周傳出會進行經貿會談後，歐股開始轉弱，中美對談係咪會令資金流出歐洲股市？

iFast Global Markets副總裁溫鋼城指，從投資者角度睇，如果中美國關係較好，就會減少買歐洲貨品，令歐股反應較負面，而當投資者睇唔透中美關係，就會覺得中國會同歐洲合作多啲，形成一個歐美相反關係，所以歐股前兩年都係跑輸美股。

Harris續指，睇返歐股3大市場估值，其實3個股市嘅PE都好低，即使德股PE逾18倍，貴過其餘兩個市場少少，但對比美股嘅23倍至24倍PE仍有一段差距。此外，之前俄烏局勢亦影響歐股走勢，但市場近期已對呢個議題麻木咗，只要戰事唔影響西歐就冇問題，溫鋼城認為，歐股依家追緊落後，戰事陰霾略為消散及中歐關係都推動緊市場，而歐股3大市場，佢認為法國股市值得考慮。