【環球金融快線】中資科技股「戰火」下大升因為...

【Now財經台】雖然中美貿易戰正式開打，但中資科技股持續強勢，中芯國際(00981)、中興通訊(00763)、阿里巴巴(09988)股價周二(4日)繼續炒上，連周一(3日)偏軟嘅京東集團(09618)及美團(03690)，今日都彈高，回顧2018年嘅中美貿易戰，當時中資股首當其衝，點解呢啲科技股喺「中美貿易戰2.0」咁強勢？

易方資本投資總監王華指，中芯大升主要係有報道指集團克服咗5納米製程，似乎擺脫咗美國制裁嘅枷鎖，其實呢幾家公司嘅基本面都做得好好，以另一家內地巨企華為為例，2018年開始一直受美國打壓，但仍頂得住，營業額仲好靚仔，估計今年營收會按年會增長幾成，呢啲都係美國預期之外。此外，如果喺本土製造人工智能(AI)晶片，需求會好大，以依家嘅先進製程完全唔夠，需要以倍數咁增加，但又要增加開支，推高成本。

王華又指，中芯及中興嘅特色係外資籌碼較少，而且接近耗盡，而當籌碼開始傾斜時，股價升勢會特別明顯。