【期匯決算】中美會談點影響人仔走勢？

【Now財經台】美英達成今輪貿易戰首個協議，明日(10日)就輪到中美展開會談，美國總統特朗普(Donald Trump)估計，談判會有實質進展，離岸人仔係咪繼續受制於美元走勢，後市點睇？

瑞穗銀行首席亞洲外匯策略師張建泰指，相信人仔喺7.2水平樓下較難出現突破，佢認為人民銀行唔傾向畀人仔繼續升值，因為會打擊出口，所以去到7.19至7.2水平，就宣布減息降準，見到美元冇繼續被拋售，人仔就有機會見返7.25水平。

貿易談判方面，Ken就話，美國偏向樂觀，但中國就冇乜特別表示，今早(9日)出爐嘅4月外貿數據好過預期，但未必利好貿易談判，主要係經濟未有顯著惡化，中美領導人可能唔傾向為咗達成協議而作出太大妥協，相信周末嘅會談中，合作空間較大嘅議題可能只有芬太尼(Fentanyl)，但都唔會有太大期望。

此外，雖然有消息指，特朗普考慮大減中國關稅至50%，但Ken認為，中國都未必會作出太大讓步，就算關稅大幅下調至50%，但相比以往，稅率升幅仍好大。