【期匯決算】美元短期仍會強勢

【Now財經台】美國今晚(12日)會公布今年1月消費物價指數(CPI)，估計CPI及核心CPI維持喺近3%水平，市場最新估計聯儲局下半年先會再減息，前財長薩默斯(Lawrence Summers)預期，美國通脹壓力會爆發，美元係咪仲可以維持強勢？

東亞銀行財富管理部高級投資策略師黃燕娥估計，美元短期會持續強勢，主要係市場等緊美國總統特朗普(Donald Trump)嘅新關稅政策，暫時只係加咗中國10%關稅，市場依家關注加拿大、墨西哥及歐元區情況，估計相關政策出台前，美元仍有一定支持。

Angela續指，投資者要繼續留意美國通脹情況，雖然聯儲局上個月按兵不動，但通脹有回升跡象，佢認為，去年底通脹已回落到樽頸位，但唔會好似2021年咁誇張，因為當時有俄烏戰事及供應鏈問題，又預期美匯指數喺107水平有支持。