【息賺】食息買美公司債好過美高息股

【Now財經台】美國債息係咁升，30年期衝上5.5厘樓上，10年期都升至5.2厘水平，依家係咪買返多啲美債或其他國家嘅國債好時機？股息唔夠5厘嘅股票股價壓力會唔會較大？

獨立資產配置策略師方源指，現時綜合消費物價指數(CPI)或個人消費開支(PCE)物價指數約2%至3%水平，所以國債明顯跑贏通脹，有一定吸引力。佢又話，揀國債要睇身處嘅國家或地區，同埋主要使用嘅貨幣，例如英國國債同美國國債差唔多，10年期債息更高，加上用其他貨幣買債券要承擔外匯風險。

佢估計，今個加息周期唔會太長，面對息口壓力，經濟已出現極慢放緩跡象，但仍錄得增長，又認為美國聯儲局未必有能力加息1至2厘。

Erik表示，買美國高息股要畀30%稅，但其實所謂高息股，只係收5厘至6厘股息，美國食品行業巨頭例如金寶湯(The Campbell’s)及溫蒂漢堡(The Wendy’s)今年都要削股息，公司本身「周身債」，加息環境令公司現金流變得緊絀，買公司債回報反而更可觀，若投資者想博減息周期來臨或公司股價升，不妨等明年加息周期完結再入場都未遲。