【息賺】英債務問題唔大英鎊買得過

【Now財經台】美國10年、30年期債息持續高企，美國國家債務首度突破40萬億美元，令市場對未來通脹有戒心，投資者會要求更高回報、更高利息，先願意繼續持有美債，30年期長債息已連續35個交易日高於5厘，情況十分罕見，美國債息短期係咪仍繼續居高不下？

上海商業銀行研究部主管林俊泓指，由於國債回購額度唔夠，對長息嘅影響只有4點子至5點子，影響十分有限，加上買長債係靠發短債吸嘅錢去彌補，冇額外新資金，因此，美債息好大機會持續高企。

Ryan估計，要等人工智能(AI)相關超大規模雲端服務商(Hyperscalers)減低發行量，吸少咗錢，等呢啲錢流返去國債市場，到時債息先會企返穩。

此外，七大工業國集團(G7)入面，長債息及官方指標利率拍得住美國係英國，同樣反映投資者要求更高回報，先至願意長期持有英國國債，依家買英鎊鎖定較高息率回報係咪合理？

林俊泓認為，英鎊可睇高一線，雖然喺G7入面債息第2高係英國，但其實英國實際債務問題唔大，對比其他歐洲國家財赤比例算係理想，加上加息空間、風險冇市場想像中咁大，所以市場對英國嘅擔心似乎過咗龍，息率同風險唔匹配。