【息賺】關稅戰下點揀保險股？

【Now財經台】關稅戰禍及美債市，美國財政部上周二(8日)推出580億美元，折合約4498億港元嘅3年期國債，市場反應似乎唔太熱烈，據《彭博》調查指，若未來6個月要增加美國以外資產，三分之二嘅投資者會選擇配置歐洲市場及歐元資產，美債吸引力下降，歐洲市場係咪值得留意？美國國債波動，對保險股亦有影響，友邦保險(01299)上周累跌16%，跑輸恒指期內約8%跌幅，想有穩定息口回報，保險股應該點揀？

獨立市場策略師何啟聰指，受惠於美元貶值只有歐元及日圓，依家歐元區的確係較受市場歡迎嘅選擇，雖然喺關稅政策下，全球經濟都會被拖累，但歐元仍相對較受惠。

保險股方面，佢就話，友邦揸唔少美債，波動性會較高，雖然唔會影響現金流，但有機會拖低公司帳面值及估值，而關稅本來已波及東南亞國家，因此，友邦要面對受關稅及美債問題夾擊，佢建議不妨等投資氣氛好轉再考慮入手，但中資保險股走勢仍以宏觀因素為主，可以考慮入手新華保險(01336)等，業務基本面唔錯嘅股份。