【息賺】樓市終迎來「小陽春」？

【Now財經台】隨著跟內地通關，本港樓價似乎搵到支持，雖然樓市「辣招」仲未撤銷，但樓市開始有回穩跡象，甚至有分析認為將迎來「小陽春」，據代理數據顯示，1月16日至22日當周，全港35個大型屋苑合共錄得81宗成交，較去年同一個檔期大增1.4倍，唔同價位嘅交投都顯著回升，交投明顯活躍返，樓市係咪真正開始回暖？

中原資產管理投資總監洪龍荃指，本港樓市明顯開始明朗化，內地經濟喺剛過去嘅農曆新年有唔錯嘅復甦，加上香港同內地通關，有效提振潛在買家嘅信心，話畀市場知內地及香港經濟開始恢復，樓市可以擺脫之前「陰乾式」下跌格局。樓市去年嘅低位為依家打咗個唔錯嘅底，投資者對經濟前景有返信心，之前有興趣入市嘅資金依家開始流入，交投上返嚟，樓價都開始止跌回升。