【財經TOP SEARCH】追炒賭股小心有伏

【Now財經台】截至早上11時止，1小時內《彭博》用戶關注度上升最多港股，依次為永利澳門(01128)、金沙中國(01928)、銀河娛樂(00027)、國泰航空(00293)及安踏體育(02020)。

近排有多家大行排隊唱好賭股，摩根大通日前指，賭股已幾乎收復晒今年失地，但估值修復空間仍然好大，又話賭股明年表現會更好，最牛可錄得以倍數計升幅，花旗就估計，明年行業EBITDA可回復至疫前36%，後年更達85%。內地及香港都先後放寬防疫措施，澳門會唔會跟隊，下一步就同內地通關？賭股未來上升動力會有幾大？

椽盛資本投資總監曾永堅指，雖然內地防疫措施放寬步伐比市場預期快，不過，內地唔少城市嘅確診人數都升緊，甚至可能有爆發性上升嘅風險，估計通關最快要等春節後，甚至明年「兩會」後，因此，短期內通關未必係推高賭股嘅因素，而賭股估值收復空間亦有限，因此，賭股未必會爆升。