【公司專訪】東瀛遊:未來投放更多資源喺國內遊(下)

【Now財經台】聖誕長假期結束，加上亞洲貨幣弱勢，吸引唔少消費者外遊，總結2024年，東瀛遊(06882)出境旅遊業務係咪已全面復甦？未來展望又係點？

東瀛遊執行董事禤國全表示，總結2024年，集團營業額及客量已回復至疫前水平，不過，展望2025年，佢坦言暫時仍未太清晰，除咗剛過去嘅聖誕節，仲要留意今個月底嘅農曆新年假期，因為呢兩個長假期好接近，消費者可能只會揀1個假期飛，咁就會對營業額有影響。

佢又話，航空公司運力喺2024年第4季已經恢復，其中，東南亞及日本航線已回復至疫前85%至90%，所以機票價格亦穩定地回落，加上內地旅行團生意理想，除咗歐遊外，有更多消費者會選擇到內地不同城市旅行，國內旅遊可以話係「百花齊放」，因此，集團未來會投放更多資源喺呢方面。