【公司專訪】德勤:港要靠「中西合壁」特色吸外資(下)

【Now財經台】去年香港公司強制清盤創14年新高，德勤中國副主席黎嘉恩年初時接受訪問時曾提及，投資內地或香港市場嘅外資減少，甚至形容「當外國資金或基金聽到內地企業，就唔考慮投資」，不過，近期中央聯同各個部門，以超乎市場預期嘅力度去救市、刺激樓市及谷消費，會唔會令外資重燃對內地市場嘅憧憬，重拾投資信心？

黎嘉恩指，中央出手當然會有幫助，但引嚟嘅資金可能純屬炒作，唔係長線投資，因為要長線資金重臨，才可反映外資對投資內地及香港市場嘅信心真正返嚟。

至於點樣吸引長線資金，Derek就話，要視乎未來政策對投資者或債權人嘅支持有幾大，確保佢哋嘅利益或權利唔會受損，先可以令投資者有信心作長線部署。

佢又話，香港要強調自身「中西合壁」嘅特色，會有助香港突圍而出，填補其他內地一線城市欠缺嘅特質，先可以吸引外國企業來港投資。