【輪證贏家】恒指熊好難放過2000幾張期指

【now.com財經】噚日前輪商朋友Gary whatsapp 我開心share咗件事，就係終於喺呢個咁沉悶嘅港股有新嘢玩：以美股Apple嚟做Underlying嘅Call/Put終於上線啦*！So far Call/Put暫時各有一隻，初步階段啫，老老實實，對港人嚟講，玩Apple Call/Put嘅興趣似乎會比美指Call/Put更大，可能係大家本身對Apple嘅認識多於美股指數，又可能大家手拎住嘅已經係Apple產品，有份額外嘅親切感。玩法同平時買返以港股做Underlying嘅Call/Put完全一樣，只係擔心初期可能無乜人知亦都無乜人掂，件事未必太活躍；不過，其實依家炒股嘅眼光都已經唔止焗限於港股，依家有樣新Product放喺度可以追Apple股價，仲只要有個港股Account就已經可以做買賣，成件事方便過返大陸用AlipayHK，兩號卡都慳返。

依家9點4分，恒指行緊U盤，恒大三寶又嚟停牌，都市傳說係指爺爺對恒大「負」可敵國已經有心無力，內房唔係重新沉寂，只係繼續沉寂，恐怕港股今日都會係一樣。

未開市見到一堆成份股都紅色，先睇牛熊證街貨圖。今日牛證首兩層街貨量肥過肥媽，首兩層夾埋已經有相當於2,168張期指。至於熊證嗰邊，見到今日有兩層新增街貨層，最貼價見17,600至17,699點，係呀，以噚日收市價計，指數的確踩住熊證街貨第一層。不過牛證咁重貨，今日又係期結日，雖然期結日往往都會造返好個市，以靚價收場；但呢啲嘢唔係必然架，噚日恒指日線見「身懷六甲」，10天線都只係見17,813點，同噚日收市價只係爭200點，已經唔話佢過得到上中軸樓上先至再講啦。

今朝指數開市跌24點，報17,587點。及至開市後指數有一下向上高衝，但都仲未睇得切個點數，佢已經得返條上影線喺度，佢廢我都無計，淡倉喺作戰室好似煙花咁爆住食餬。

依家9點41分，恒指五分鐘圖上見指數低走過後出現兩粒燭都見比較長嘅下影線，Suppose呢啲位指數之後都會縮 一縮，但無，Slow STC(14,3)兩線仍然向住超賣方向扯緊指數向下，保歷加通道口亦拓闊中，呢啲位出淡倉其實係可以博保歷加通道保持拓闊兼拉到盡之下，開始見頂線向下移，或者指數同Slow STC(14,3)有出觸底嘅先兆，咁隻淡倉爬完收工。但呢啲咁快嘅動作，都係交比作戰室去做。

呢度仍然揀住隻淡倉出嚟，實在好難放過嗰2,000幾張期指。恒指熊(54817)，收回價17950點，同現價有約360點差距，槓桿約45.1倍夠做Day Trade。如常的用返五分鐘圖嘅Slow STC(14,3)做Swing落場可以，進取嘅又見中軸唔過就借佢阻力出場囉。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。

作戰室免費試用，詳見專頁：https://bit.ly/3uixP4Y