【輪證下半Part】20000點今日到唔到？

【now.com財經】今朝揀咗隻恒指熊(50428)出嚟，出熊乃念指數靠近牛證街貨，同時都見小時圖上指數跌穿保歷加通道中軸。今朝Patreon出文時間大約為10點40分左右。喺11點至12點呢個鐘裡面，其實都已經見到指數喺小時圖上失中軸水平，今朝都講過以小時圖嘅保歷加通道底線做目標，所以吼11點至12點呢段時間，以指數於小時圖上失保歷加通道中軸而出淡倉的話係可以，而之前偷位注都係保歷加通道中軸作量度入市線。以11點至12點(50428)高低位做過0.095元/0.086元計，平均買入價為0.0905元。

中場休息嘅時侯，雖然只係得一個鐘，但我都會開開電視，一來有啲聲，二來睇下啲唔用腦嘅嘢嚟放鬆一下。我家貓咪都應該真係做咗電視精，一開電視無耐就係佢平時瞓覺嘅地方走出嚟，坐喺梳化度眼定定咁望住個電視，無論你轉咩台，講廣東話定英文，體育節目定新聞直播，佢都係得一個樣，除非電視又有小貓咪或者獅子老虎出現啦。

下半場開市之後，首五分鐘指數再出現今日新低，作戰室裡頭有戰友話「點解恒指做咗新低都無人講？」之後，唔少戰友都認為恒指創新低都唔係啲咩新聞，的確，去到1點20分，指數再嚟多個新低，低見20,109點，即係話20,100至20,199點嘅牛證，爭9點又全數死亡。咁小時圖上嘅保歷加通道底線(約20,009)點，其實講緊都只係相差100點咋喎，分分鐘恒指同出面個天一樣，落足一日雨都唔出奇；當然，落雨出街要帶遮，做任何Trade都要Risk management，Set定以五分鐘圖數上破保歷加通道中軸為止蝕位啦。

作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。

想入作戰室？Click呢度就得：https://www.patreon.com/cbbcwar

FB：https://bit.ly/3uixP4Y