【FINTERVIEW】英Sir:可留意拉美市場、揸多啲Cash(上)

【Now財經台】美股繼續穩步回升，美國總統特朗普(Donald Trump)昨晚(8日)宣布，同英國簽署首份貿易協議，市場似乎對貿易戰現轉機感到樂觀，美股今年有冇機會再創新高？呢浸反彈有冇超出預期，依家應該點部署？

黃國英資產管理董事黃國英指，市場情況的確超乎預期，雖然經濟仍然差，但市場相對樂觀，一啲非中、非美嘅地區表現更強勁，但宏觀消息仍有風險，所以唔可以睇得太樂觀。

英Sir認為，美股今年再破頂機會唔大，始終美國面對滯脹(Stagflation)風險，相對英國，美國要同中國傾掂數係較難，佢又認為市場太樂觀，不過，雖然指數要全線創新高唔易，但個別新興股份有機會繼續炒上，即炒股唔炒市。

英Sir續指，依家揀股嘅策略非常重要，現時較強嘅概念包括人工智能(AI)應用，由於AI基建需要強勁嘅資本開支，喺經濟環境不明朗下會比較遜色，例如晶片股，所以可以著眼於應用層面嘅公司。

佢又話，一啲非中、非美地區，如拉丁美洲、歐洲及東南亞市場都值得留意，又建議要保留較高現金水平，始終經濟不確定性仍高，一旦貿易談判有咩閃失，市場回落速度會好急，所以要有足夠嘅緩衝，唔應該太進取，亦唔太建議一般散戶造淡，因為風險較大，宜做保守部署。