【FINTERVIEW】DOGE查聯儲局響獨立性警號？

【Now財經台】美國總統特朗普(Donald Trump)上任後隨即開打嘅關稅戰，係市場最大不確定因素，聯儲局主席鮑威爾(Jerome Powell)昨日(11日)喺參議院銀行委員會作證時指，依家面臨嘅不確定性仍處於正常水平，係咪代表唔使太擔心？市傳由Tesla行政總裁馬斯克(Elon Musk)領導嘅美國政府效率部(DOGE)會調查聯儲局，係咪對聯儲局獨立性響起警號？

金馬資本管理交易策略師蘇沛豐指，市場嘅憂慮唔會因為鮑威爾講一句說話就可以扭轉，加上特朗普嘅招數經常係「估佢唔到」，佢之前暫緩1個月向加拿大、墨西哥加關稅，如果其他國家好似加墨一樣作出妥協，特朗普有可能會押後徵稅，甚至撤銷。佢又認為，聯儲局會審慎評估關稅政策對通脹嘅影響，亦會等數據出嚟之後，再調整貨幣政策。

至於DOGE調查聯儲局，Daniel認為，DOGE嘅調查只係集中開支方面，例如人手配置係咪臃腫、有冇裁員空間，以減省成本，唔係要干預聯儲局嘅貨幣政策。