【now.com財經】智能家居大家可能聽過，近年仲流行「全電家居」，喺全球減碳熱潮下，有電力公司協助發展商發展「全電家居」，由日常起居到出行，全方位節能減碳。
究竟咩係「全電家居」呢？顧名思義就係全屋都係用電，除咗燈、冷氣機之外，煮食爐同熱水爐都係全電，日常生活就更容易做到環保低碳。
平時煲湯煮飯，煮食用嘅能源費都佔屋企開支一部分。電力公司之前委託大學做研究，發現用電煮食平過明火煮食，例如用電磁爐煮兩餸一湯，比起用明火煮同樣嘅餸同湯，慳大約三成能源費。由於電磁爐、鑊底同煲底都係平面，大家貼到實一實，電磁爐嘅熱力會直接傳去鑊底同煲底，唔會好似明火咁流失到空氣中，隻鑊夠晒熱又夠鑊氣，但廚房就冇咁熱，煮飯會舒服得多。
「全電家居」如果用埋一級能源標籤嘅家電，咁就可以更加慳電環保。舉例一部一級能源標籤嘅冷氣機，比起一部三級能源標籤嘅冷氣機，可以慳大約三成半嘅電。
市場上新落成嘅樓宇，一般都已經裝咗智能電錶，「全電家居」當然唔例外。有咗智能電錶，住客平日管理用電開支就更方便，佢地可以隨時隨地用手機App，睇到四個鐘前嘅每小時用電量，掌握屋企嘅用電情況，再調整自己日常嘅用電習慣，節省無必要嘅用電，例如唔好長開燈同電視機、冷氣機唔好開咁凍等等，慳電又減碳。
有啲屋苑唔止單位入面全部用電，連會所宴會廳都用埋全電廚房，加埋停車場全部泊位都裝咗電動車充電器，令「全電家居」嘅裏裏外外可以更低碳環保！
鍾練仁
