【名家給力場】金價拋物線式上升 沽空隨時被夾死(上)

【Now財經台】關稅戰新聞日日都有，仲日日有新發展，搞到市場都疲於奔命兼無所適從，喺呢個亂局下，有避險功能嘅黃金，價格不斷破頂，過去幾個月湧入金市嘅資金係咪好多？

「股市漁夫」創辦人莊志雄指，近期湧入金市嘅資金應該係多咗，尤其之前見到央行係買多咗黃金，同埋要留意近期金價升主要喺亞洲交易時段，呢個現象幾有趣，所以大家可以留意下。

Lewis又話，見到基金經理態度出現180度轉變，因為2月及3月美銀做調查時，冇基金經理話要買黃金，但依家有49%話要建立長倉，變成最擠擁交易。佢續指，依家美債波動，但揸美債係求穩陣，所以投資者對美債嘅信心都弱咗，加上外國投資者係咪會再增持美債都係一大問號，所以資金湧入金市係好合理。

佢續稱，依家金價呈拋物線式上升，即係由情緒主導，出現一啲恐慌，當金價愈扯愈急時，再去追入就唔係咁好，佢又提醒，呢種拋物線式上升可以升得好急，如果依家沽空有機會被夾死，揸住黃金嘅投資者可以繼續持有或減磅，冇貨就不宜高追。