【名家給力場】短期要增A股及港股配置(上)

【Now財經台】美國總統特朗普(Donald Trump)2.0關稅實施以來，被徵關稅嘅股市今年以來一直跑出，反而暫未未被徵稅嘅盟友，股市表現就麻麻，情況同去年相反，點解會出現呢個情況？

「股市漁夫」創辦人莊志雄指，始終特朗普係生意人，初期講嘅嘢，到後尾落實可能有好大差距，所以更重要係依家睇到嘅資產價格表現。佢又話，年初至今已經差唔多30個交易日，有關稅消息嘅國家或地區，明顯都係跑贏標普500指數，仲有較特別嘅巴西，係舊「金磚四國」其中一個重要嘅國家，竟然係做得最好。中國市場方面，港股表現真係較差，A股造得最好係科技股，CSI中國互聯網股市ETF位列第2。

此外，墨西哥股市截至昨晚(11日)美股收市止，累升9%，富時歐洲都係跑贏，同去年有好大分別，巴西去年係做得最差嘅股市，累跌30%，所以與其聽關稅消息，不如留意影響股市嘅兩大因素，就係資金流向及估值。

Lewis認為，配置喺新興市場嘅資金，其實都係跟住指數去睇表現，過去幾星期，甚至未來一兩個月，其實都要增加返A股及港股配置，尤其內地大型科技股，因為以估值角度睇，印度係貴，中國相對平，如果以科技股角度睇，外國價值投資者都會揸重貨喺中資科技股，例如阿里巴巴(09988)，導致有估值差距喺度，依家資金流向似乎開始逆轉，由新興市場轉去巴西、中國，所以大家要留意呢啲資金流。